Luke 10
Iesu sila vangi meatin keil uva lualu avoum
1Katau en avong enek, Iesu rie lat meatin sav keil heite hanumau etel ka halualim emun (70). ▼ Evus, sila keil uva lualu en meteimal keil vasi. Iesu vit keil iha ilamu eni, ka hervitei tuetin, kei mun heha houm en out keil enek. 2Iesu viteni min keil vit, “Anien houlu mul en ah, ka meatin keil arvitei houlu keke avaha avasuhut eni. Sakini, mihehis min Asuv ten ah keke hesan meatin keil ihi houlu tamun avamai avoum en ah osen. 3Alva, ka tahos keke mihelei kat revi kami. Veni namul nasila kami suval mivi sili sipsip keil koa miva en out koa huli rendan keil houlu amul ien. 4Ka navong miva, minalahtei tounah keil onami. Minakurtei mane, vuo ateili, vuo sandel teimun natal min kami. Ka minouastei avong onami natal min meatin keil en sise onami. 5Ka navong mihehotin meatin tai koa hesi kei keke vakur revi kami, miheto en teim sen. Ka navong miva rohtoh en teim sen, mihehiteni mihehit, 'Tomat onen Ahi hel ven kami.' 6Ka munak tinahos mul en meatin keil en eim enek ka akur revi kami, tomat onen Ahi koa mul en kami hel ven keil. Ka munak keil asesein kami, tomat onen Ahi helokovein keil ka heles hel ven kami navong miva. 7Mihetos en eim omon meatin koa kur revi kami, ka anien vuo oai sa koa asani min kami, mihekuri enges. Veni mal keke meatin toumien hekur ui umen onen. Ka minahatei minato en teim savsav keil. 8Ka navong miheha en meteimal ka meatin keil ten out enek ikur revi kami, anien sa koa isani min kami, miheani. 9Mihesak revi meatin keil en out enek koa amesai ka mihehitehiteni min keil mihehit, 'Hiasuvien onen Ahi mul mai vesesal ven kami.'10“Ka munak miheha en meteimal tai koa meatin keil teni irkur revitei kami, miheha mihelomal luhu en mari sise tai teni ka mihehit, 11'Veni mirkur revitei komal, iemal rovattei vulimeas ten meteimal onami vapil kat alomal. Sakini, melhesahulin vulimeas enek ran alomal en metomi vatie lati keke asa koa mimumoni min komal hemai heat kami eris. Kami mireingeingeni, ka kosa, hiasuvien onen Ahi mai vesesal ven kami, ka kami miseseini.' 12Anatin eli naviteni min kami, en avong koa Ahi helei revi usite vasi onen meatin keil, mahien koa hesani min meatin keil koa aro en taon enek hekeih helin asa koa hesani min meatin keil koa aro en taon ten out Sodom mulamu.”
13 b Iesu viteni vit, “!Aue li! !Hetisa min kami, meatin keil ten out Korasin! !Ka hetisa emun min kami, meatin keil ten out Betsaeda! Veni kami milei sesein merikel koa namumoni en metomi, Ahi hesan mahien hehi houlu mok min kami. Narvatei en meteimal keilu ten out Taer ka Saedon. Ka munak meatin keil ten out keilu ekek, koa arvitei Siu, avales vati merikel keil koa namumoni en metomi, tuetin tuai, avasin en musi eisin ka avativin vulimeas en vate vatie lati keke avalonge vatisa vahi houlu ven tisaen keil one ka avahiles rani. 14Sakini, en avong koa Ahi helei revi usite vasi onen meatin keil, ien hemahis meatin keil ten out Taer ka Saedon helin kami. 15?Ka kami, meatin keil ten out Kapaniam, mikur rendemien ten hetetamenien mul en kami mivit Ahi hehati lat kami miheha en out nesa? !Ka mihetimanin, heson kami miheha netan, en out ten matien!” c
16Evus, Iesu sila keil ral min selusien enek vit, “Meatin koa raengon selusien onami, suval koa kei mul raengon selusien onak. Ka meatin koa sesein kami, suval koa kei mul sesein nau mun. Ka meatin koa sesein inau, suval koa kei mul sesein Kei koa sila nau numai.” Evus, Iesu sila lat keil lualu uva.
Koakeil Iesu sila keil uva, umai ris ral min sien d
17Navong meatin keil hanumau etel ka halualim emun (70) koa Iesu sila keil uva amum umai ris, umai ris ral min sien. Keil aviteni min Iesu avit, “!Asuv, komai mesak revi meatin keil ka melesi mun keke ninin tisa keil along kat komai navong memeng kat keil en isom keke avaha!”18Ka Iesu vit kesi min keil vit, “Inau nales Temat mot ran out nesa ka vita netan suval ahil. e Veni umen onami muas keihoen onen vita netan. 19!Mihetaeong revi! Inau nasan keihoen min kami keke mihehe tan en amot tisa keil, ahai keil, ▼ ka tounah sav keil emun koa amul en keihoen onen Temat. Anatin, mihehe tan en keil ka tounah hetovuol hekula kami. 20Ka minasitei kami veni ninin tisa keil amul along kat kami. Tahos imok mihesi kami veni Ahi mutis kat isomi va en Tus ten Moulien g koa mul en out nesa.”
21En avong enek, Ninin Votut sakin Iesu vilelau en sien ka vit, “Tata, keik kovi Asuv ten tounah keil vasi en out nesa ka en out netan. Namasmasuk houlu mok veni koling suain tounah keil enek keke koakeil akur meteisauen ka ileilien ten out netan asakras availea eni. Ka kovothot eni min koakeil asuval titiali keil koa arsukul revitei. Anatin Tata, keik komumoni musil rendemien onom koa koling kati tuai.”
22Evus, Iesu viteni min vangi meatin keil vit, “Tata onak ling tounah vasi en hek. Meatin keil arlei kileatei Natin Ahi, Tamen enges lei kilea eni. Ka meatin keil arkileatei en Ahi Tamen, Natnali enges kilea eni. Ka koakeil enges Natnali enek ien vati vahothot en Tamen min keil, keil emun ilea eni.”
23Evus, Iesu viles les meatin keil onen ka viteni min keil sase vit, “Tokolkatien onen Ahi mul tuai en kami koa mimul miles tounah koa mul kur out en metomi. 24Anatin eli naviteni min kami, en avong telamu, provet keil houlu ka asuv houlu keil emun evati mok avales asa kami mimul milesi, ka keil arlestei. Ka ie vati mok avalong asa kami mimul milonge, ka keil arlongtei.”
Iesu viten tatavolien usil more meatin tai ten out Sameria
25En avong enek, tiser tai ten Mengkatien keil onen Mosis mai ven Iesu keke vasak visi. Sakini, vis Iesu vit, “?Tiser, numon sa keke makur moulien koa sakras vavus?”26Ka Iesu vit risi mini vit, “?Mengkatien keil onen Ahi mul viten sa? ?Keik kihiteni minau?”
27Meatin enek vit risi mini vit, “'Iemi hehat Iahova koa vi Ahi onami en tinomi, en moulien vasi keil onami, en umen vasi onami, ka en rendemien vasi keil onami.'(Dut 6:5) Ka'Ienvatien onom hel en tuami keil hesuval koa keik iem vat keik eris.'(Lev 19:18) “
28Iesu vit kesi mini vit, “Selusien onom mal vasi. Munak kumoni, kikur moulien koa sakras vavus.”
29Ka veni ien rovattei meatin keil analei heisav eni, kei vis ris Iesu vit, “?Ka meatin sa varei vi tuak?”
30Sakini, Iesu viten tatavolien tai mini vit, “En avong tai, Siu tai mea ran out Serusalem ka mual vit vaha en taon ten out Seriko. Ka navong musil sise onen va, vangi tarhena keil umai avuli kati. Keil alah lat eisin omon ka amuasi. Vesesal meatin enek vamat, ka alokoveini mules. 31Evus, tahos keke pris tai onen Siu keil mul mual musil sise ka lesi. Ka navong lesi, mual seh rani va en usite. 32Rovitei tuetin, Siu tai ten vatiamal onen Livae koa mum en Eim Votut onen Ahi mul mual mai. Kei mun mul musil sise ka les meatin enek. Ka navong lesi, kei mun mual seh rani va en usite. 33Evus, koan Sameria tai koa Siu keil alele tisa en keil kistal ka mul mual musil sise ka les meatin enek. Ka navong lesi, ien mahisi. 34Sakini koan Sameria enek mai veni, kas motein manu keil onen en uaen, ling oel ien, ka sar koe manu keil onen. Evus, voulat meatin enek ka ling revi en dongki osen. Kei vousi va en eim tasehien tai ka mul lei kat revi. 35En visokon teni, kei san mane taosen elu (2000) min meatin koa mul losil kat eim enek. Evus, viteni mini vit, 'Kilei kat revi meatin ekek. Ka munak mane koanek rovinvitei, asa mun koa kumoni mini, nihul lati navong nimai ris.'”
36Evus, Iesu vis tiser ten Mengkatien keil onen Mosis vit, “?Komundem sa? ?Isei en meatin keitel ekek rie lati keke vi tunali meatin koa tarhena keil amuasi?”
37Kei vit risi min Iesu vit, “Meatin koa rie lat ienmahisien mini.”
Ka Iesu viteni mini vit, “Tahos, keik emun kiha kumoni hesuvali.”
Iesu va en eim mon Marata ka Meri
38Navong Iesu ka meatin keil onen amual uva en out Serusalem, keil umai en meteimal ten out Betani. En meteimal koanek, ahin tai ro ien, isen Marata. Ka kei kur revi keil en teim sen. 39Tunahin, isen Meri, mai ven Iesu ka rondan vesesal en alen. Kei mul raengon revi hihiseien keil onen. 40Ka Marata sakras vataengon revi veni kei mul sak mesen anien ae. Ka veni mum houlu, kei mai ven Iesu ka viteni mini vit, “?Asuv, mukave? ?Komundemi tahosis keke tukahin lokovein umen keil ekek ka vit inau nges numoni? Kihiteni mini vamai vakataunau.”41Ka Asuv viteni mini vit, “Marata, Marata, komundemko houlu ka rendemien onom konakon usil tounah keil houlu. 42Tounah tas mal keke kamil milvoumoni. Meri ling rendemien onen tuai keke voumon asa koa mal imok, ka inau nirkulattei rani.”
Copyright information for
PMA